2026-yil 14-aprel kuni Institutimiz tomonidan tinglovchilar va xodimlar uchun Islom sivilizatsiyasi markaziga ma’naviy-ma’rifiy tashrif uyushtirildi. Tashrif davomida markazda yaratilgan zamonaviy sharoitlar, boy ekspozitsiyalar va noyob tarixiy manbalar bilan yaqindan tanishdilar. Xususan, qadimiy qo‘lyozmalar, tarixiy hujjatlar, ilmiy asarlar hamda turli davrlarga oid eksponatlar katta qiziqish uyg‘otdi. Mazkur eksponatlar orqali islom sivilizatsiyasining shakllanishi, rivojlanish bosqichlari hamda uning jahon ilm-fani va madaniyatiga qo‘shgan ulkan hissasi haqida batafsil ma’lumotlar olindi.
Ekskursiya jarayonida mutaxassislar tomonidan islom olamida yetishib chiqqan buyuk allomalar, ularning ilmiy merosi, kashfiyotlari va insoniyat taraqqiyotidagi o‘rni haqida keng qamrovli tushunchalar berildi. Tinglovchilar interaktiv ko‘rgazmalar va zamonaviy texnologiyalar asosida tashkil etilgan taqdimotlar orqali tarixiy voqealarni yanada jonli va ta’sirchan tarzda his etish imkoniga ega bo‘ldilar.
Shuningdek, tashrif davomida ishtirokchilar o‘zlarini qiziqtirgan savollariga javob olishdi, fikr almashdilar va mazkur maskanning ilmiy-ma’rifiy ahamiyati yuzasidan o‘z taassurotlarini bildirdilar. Bunday muloqotlar tinglovchilarning tafakkurini kengaytirish, ularni mustaqil fikrlashga undashda muhim ahamiyat kasb etdi.
